I dag er det 200 år sidan han som vert kalt nynorskens far vart født.
Namnet er  Ivar Aasen, kven skulle det ellers vera.

Her finn ein han på frimerket frå 1963, mannen som starta opp som botanikar med eit herbarium med 509 plantar, og som enda opp som språkforskar og grunnleggjar av det nynorske skrift og talespråket basert på landsomfattande gransking av dialektar og ordbruk.
Som opprinneleg nynorskmann og framleis brukar av dette språket tykkjer eg at det er på sin plass å stogga opp og minnast mannen i dag. Me opplever meir og meir at språket vårt vert utvatna, særleg av engelsk. Sjå berre på jobbannonsene i avisene. Der vil du finna mange av dei på engelsk.
At me har to norske språkformer i dag har skapt og skaper diskusjonar om eit lite land som vårt bør halda seg til fleire språk og nynorsken er stadig under press. Det tykkjer eg er synd, for me er framleis mange som likar å nytta den språkforma, og personleg tykkjer eg at den gjev meg større utval av ord til å nyansera skriftspråket. 

Så attende til ei anna side av Ivar Aasen. Han sleit vist mykje med å finna seg ei kone, og det seiest om han at han fridde i hytt og pine, men alltid med negativt resultat.

Til sist, takk for at du synte oss vårt eige målføre, Ivar…